Мамлекеттик ипотекалык компанияга жаңы төрага дайындалды
“Мамлекеттик ипотекалык компания” ААКнын директорлор кеңеши Талант Жекшеновду Башкармалыктын төрагасы кылып дайындады. Бул тууралуу ведомстводон билдиришти.
Талант Жекшенов 1982-жылы туулган. Жусуп Баласагын атындагы Кыргыз улуттук университетинин юридикалык жана И. Раззаков атындагы Кыргыз мамлекеттик техникалык университетинин тоо-кен иштери жогорку билимдерге ээ. Ал ошондой эле Шералы Сыдыков атындагы Олимпиадалык резервдердин адистештирилген мектебин да бүтүргөн.
Көп жылдык тажрыйбасынын ичинде Жекшенов президенттин Иш башкармалыгына караштуу “Спорттук комплекс” жана “Ала-Арча” мамлекеттик ишканаларынын директору болуп, “Кыргызкөмүр” мамлекеттик ишканасында директордун орун басары катары эмгектенген.
Дайындоо “МИК” ААКнын башкаруу тобун бекемдөөгө жана иштин натыйжалуулугун жогорулатууга багытталган. Мурдагы төрага пландаштырылган ротациянын алкагында башка кызматка которулду.
