Ноокаттагы мектеп капиталдык ремонттон өтүүдө
Ош облусунун Ноокат районуна караштуу Төөлөс айылындагы Уркуя Салиева атындагы мектепте кеңири көлөмдөгү капиталдык оңдоо иштери жүргүзүлүп жатат. Мектеп 1968-жылы курулгандан бери ири ремонт жасалбаган. Бул тууралуу Курулуш архитектура жана турак жай-коммуналдык чарба министрлигинен билдиришти.
Маалыматка караганда, оңдоо иштери 2024-жылы республикалык бюджеттин каражатынын эсебинен башталган. Азыркы тапта мектеп имараты толугу менен жаңыланууда: ички жана тышкы бөлүгү оңдолуп, жарыктандыруу жана жылытуу системалары толук алмаштырылууда.
Долбоорго ылайык, мектеп 524 орунга эсептелген. Оңдоо иштери аяктагандан кийин дээрлик 1000ге жакын окуучуга заманбап шартта билим алуу мүмкүнчүлүгү түзүлөт.
