ИИМ: Чет өлкөдө жана Кыргызстанда мыйзам сактоо боюнча негизги кеңештер
Ички иштер министрлиги Кыргыз Республикасынын чет өлкөгө чыгып жаткан жарандары жана өлкөдө жүргөн чет өлкөлүк жарандар чет мамлекеттин мыйзамдарын, коомдук тартипти жана каада-салттарын урматтоого милдеттүү экендигин эскертет. Белгиленген эрежелерди билбөө же кайдыгер мамиле кылуу административдик же кылмыш жоопкерчилигине алып келиши мүмкүн.
Кыргызстандыктарга жана чет элдик жарандарга мыйзамдардын өзгөчөлүктөрүн алдын ала окуп чыгуу, коомдук жайларда жүрүм-турум эрежелерин сактоо, ошондой эле Кыргызстандын элчилиги же консулдугунун байланыш номурларын билүү сунушталат. Өзгөчө кырдаалдарда, документтерди жоготууда же жагымсыз окуяларга туш болгондо тийиштүү аракеттерди билүү маанилүү.
Чет өлкөлүк жарандар Кыргыз Республикасына келгенде жергиликтүү мыйзамдарды, калктын каада-салттарын урматтап, коомдук тартипти бузбоого, баарлашууда сылык болууга тийиш. Мындай мамиле түшүнбөстүктөрдү жана чагымчыл аракеттерди алдын алат.
Мамлекеттик чек арадан өтүү эрежелерин сактоо, бажы документтерин так толтуруу жана бейтааныш адамдардын буюмдарын ташып берүү өтүнүчүнө баш тартуу бардыгы үчүн милдеттүү. Кээ бир товарлар, заттар же дары-дармектер чет мамлекетте тыюу салынган же чектелген болушу мүмкүн, андыктан алдын ала маалымат алуу зарыл.
Көп эл чогулган жерлерде жеке коопсуздук чараларын сактоо, документтерге көз салуу жана чыр-чатактуу кырдаалдардан качуу сунушталат. Эгер кармалып калсаңыз, укук коргоо органдарынын мыйзамдуу талаптарын аткарып, дипломатиялык же консулдук мекемеңиз менен байланышууну унутпаңыз.
Кыргызстандыктар чет өлкөдө жана чет элдик жарандар Кыргызстанда мыйзамдарды сактап, туура жүрүм-турумду карманса, коопсуздукту камсыз кылуу жана ыңгайлуу чөйрөнү түзүү жеңил болот.
