Кыргызстан менен Венгрия айыл чарба жаатында кызматташтыкты кеңейтти

Будапешт шаарында Кыргыз–венгер соода-экономикалык кызматташтык боюнча өкмөттөр аралык комиссиянын 4-жыйыны өттү. Иш-чарага КРнын Суу ресурстары, айыл чарба жана кайра иштетүү өнөр жай министринин орун басары М.И.Дуйшеев катышты. Бул тууралуу Айыл чарба минитсрлигинен билдиришти.

Жыйындын алкагында тараптар айыл чарба жана ветеринардык кызматташтык багыттарын талкуулашты. Мындан тышкары, Кыргыз Республикасы менен Венгриянын Айыл чарба министрликтеринин ортосунда ветеринардык көзөмөл жана коопсуз продукция боюнча меморандумга кол коюлду. Меморандумдун негизги багыттары:

• Жаныбарлардын оору ылаңдарын алдын алуу үчүн маалымат жана тажрыйба алмашуу;
• Эл аралык уюмдарда өз ара аракеттенүү;
• Ветеринардык илимий жана диагностикалык мекемелердин кызматташуусу;
• Ветеринардык көзөмөлгө алынган продукциялар менен коопсуз сооданы өнүктүрүү.

Ошондой эле, Дуйшеев Венгриянын Айыл чарба министрлигинин Мамлекеттик катчысынын орун басары менен эки тараптуу жолугушуулар өткөрүп, өсүмдүк өстүрүүчүлүктү өнүктүрүү, мал чарба жана кадрларды даярдоо маселелерин талкуулашты. Анын ичинде венгр жогорку окуу жайларында кыргыз студенттерин гранттык негизде окутуу программаларын кеңейтүү маселеси каралды.

Жыйын айыл чарба жаатында эки өлкөнүн кызматташтыкты тереңдетүүгө жана жаңы долбоорлорду ишке ашырууга өбөлгө түздү.