Текстиль жана тигүү тармагынын өкүлдөрү салык системасы боюнча окутуудан өттү

Мамлекеттик салык кызматы тигүү жана текстиль өндүрүшүнүн өкүлдөрүнө салык сабаттуулугун жогорулатууга жана электрондук салык сервистерин колдонуу көндүмдөрүн кеңейтүүгө багытталган окутуу семинарын уюштурду. Бул тууралуу ведомстводон билдиришти.

Иш-чарада Салык кызматынын адистери электрондук салык кызматтары менен иштөөнүн кадамдык алгоритмин сунушташты. Катышуучуларга Салык төлөөчүнүн кабинетине онлайн кирүү, салык органдарына барбай эле электрондук сервистерди колдонуу, ошондой эле Бирдиктүү идентификациялоо системасы (БИС) аркылуу авторизациялоо тартиби боюнча кеңири маалымат берилди.

Мындан тышкары, тигүү жана текстиль тармагындагы салык салуунун негизги аспектилери, жалданма кызматкерлерди эске алуу менен киреше салыгын эсептөө, бирдиктүү салыкты колдонуу маселелери каралды. Окутуунун жүрүшүндө адистер чет өлкөлөргө экспорттоодо зарыл документтер, анын ичинде электрондук эсеп-фактураларды тариздөө боюнча талаптарды да түшүндүрүштү.

Белгилей кетсек, Салык кызматы салык мыйзамдары тууралуу билимди жогорулатууга жана электрондук сервистерин колдонууга багытталган жолугушууларды байма-бай өткөрүп турат.