Кыргызстан Ташкенттеги туристтик жарманкеде өз потенциалын таанытууда
Кечээ, КР Экономика жана коммерция министрлигине караштуу Туризм департаменти Ташкент эл аралык туристтик жарманкесине (TITF) "Жибек жолундагы туризм" аттуу катышуусун баштады. Бул тууралуу Экономика жана коммерция министрлигинин маалымат кызматынан билдиришти.
Улуттук стендде 10 туркомпания, Каракол шаары жана Ысык-Көл облусунун эки дестинациясы туристтерге турпакеттерин сунуш кылууда. Иш-чара 29-ноябрга чейин уланат.
Быйыл Өзбекстан Кыргыз Республикасына келген чет элдик туристтердин алдыңкы өлкөсү катары TITF-2025ке катышуу өзгөчө мааниге ээ. Улуттук стенддин негизги максаты — өлкөнүн туристтик потенциалын көрсөтүү жана жаңы өнөктөштөр менен байланыш түзүү.
Жарманке алкагында B2B жолугушуулар, панелдик сессиялар жана туризм тармагындагы акыркы тенденциялар талкууланууда. Катышуучулар инновациялык идеяларды, авиациялык жана билим берүү форумдарын да карап чыгышат.
Кыргызстандын катышуусу Борбордук Азия өлкөлөрүнүн бирдиктүү туристтик мейкиндигин түзүүгө салым кошуп, региондук кызматташтыкты бекемдөөгө жана туристтерди өлкөгө тартууга шарт түзөт.
