Өзбекстанда электрондук тамеки колдонууга, сатууга, алып жүрүүгө тыюу салынды
Өзбекстанда электрондук тамекини жана ага жакын системаларды алып кирүүгө, алып чыгууга, сатууга, сатып алууга, сактоого тыюу салынды. Мындай норма Шавкат Мирзиеев 27-ноябрда кол койгон мыйзамга киргизилди. Lex.uz порталы белгилегендей документ 2026-жылдын 1-мартынан тарта күчүнө кирет.
Ошону менен бирге эле тиешелүү талаптарды бузганы үчүн, тагыраагы эгер тыюу салынган продукцияны ири көлөмдө реацлизациялоо же административдик жаза колдонуудан кийин кайталап мыйзам бузуу учурларында кылмыш жоопкерчилиги каралган.
Мыйзамга кирген өзгөртүүлөргө ылайык, электрондук тамекини импорттоп жана саткандыгы үчүн эң жумшак жаза – базалык эсептик өлчөмдүн 300дөн 500гө чейинки көлөмүндө айып пул төлөтүлөт. Бул 123,6 млн сумдан (10,3 миң доллар) 206 млн сумга (17,3 миң доллар) чейин.
Мындан сырткары, 2ден 3 жылга чейин түзөтүү иштери түрүндө сакнциялар, 3 жылдан 5 жылга чейин эркинен ажыратуу киргизилери каралып жатат.
Эске салсак, ушул жылдын апрель айынын аягында электрондук тамекилерди, ал үчүн атайын суюктуктарды жана никотин системаларын жүгүртүүгө тыюу салуу жөнүндө мыйзамы Өзбекстандын Олий Мажлисинин сенаты тарабынан жактырылган.
