Токтогулда балдар үчүн реабилитациялык борбор курула башталды
29-ноябрда Курулуш, архитектура жана турак жай-коммуналдык чарба министри Нурдан Орунтаев Жалал-Абад облусунун Токтогул районундагы курулушу жаңы башталган бир катар социалдык объектилердин абалы менен таанышты. Алардын ичинде Токтогул шаарынын Момункулов көчөсүндө майыптыгы бар балдар үчүн курулуп жаткан реабилитациялык борбор да бар.
Жалпы аянты 1746,95 чарчы метрди түзгөн борбор Министрлер Кабинетинин Төрагасынын орун басары – УКМК төрагасы Камчыбек Ташиевдин тапшырмасына ылайык салынууда.
Долбоорго ылайык, имарат жертөлөсү менен кошо 3 кабаттан турат. Биринчи кабатта кабыл алуу бөлмөсү, ата-энелер үчүн жолугушуу жайы, процедуралык жана кызматкерлер бөлмөлөрү, ошондой эле ашкана каралган. Экинчи жана үчүнчү кабаттарда палаталар, балдар жана кыздар үчүн өз-өзүнчө санитардык түйүндөр, ванна бөлмөлөрү, процедуралык жана кир жыйноочу бөлмөлөр жайгашат.
Реабилитациялык борбор заманбап талаптарга ылайык курулуп, мүмкүнчүлүгү чектелген балдарга ыңгайлуу шарт түзүү үчүн пандустар жана башка керектүү инфратүзүм менен камсыздалат.
Курулуш иштерин министрликке караштуу “Кыргызкурулуш” ишканасы жүргүзүп жатат.
