Мал чарбачылыгын өнүктүрүү боюнча 3 млн 500 миң сомдук долбоор старт алды
"Кыргыз Агрохолдинг" ААКсы 10 миң баш ири мүйүздүү малды багып-асыроо жана семиртүүгө арналган агроөнөр жай ишканасын түзүү боюнча долбоорду баштады. Долбоордо проектно-сметалык документация (ПСД), бизнес-план жана техникалык-долбоордук чечимдер иштелип чыгат. Бул тууралуу Айыл чарба министрлигинен билдиришти.
Долбоордо 25 гектар аянтта малды ачык аянтчада (feedlot) багып-семиртүүчү заманбап комплекс курулат. Ишке ашырууда эл аралык стандарттар жана дүйнөлүк мыкты тажрыйбалар колдонулуп, экономикалык негиздүүлүк, экологиялык туруктуулук жана социалдык аспектилер эске алынат.
Алгач 3 млн 500 миң сом суммада жарыяланган тендерде катышуучулар талап кылынган документтердин толук топтомун камсыздай алышкан эмес. Натыйжада тендердин бардык арыздары четке кагылып, тендер кайрадан 1 млн 500 миң сом менен жарыяланды. Бирок кайтарылган тендерге дагы катышуучулар табылган жок.
Долбоордун мөөнөттөрүнүн бузулушуна жол бербөө максатында тендердик комиссия келишим менен сатып алууну жүргүзүү чечимин кабыл алып, келишим ЖИ "Алиева О." менен түзүлдү. Азыркы учурда эксперттер ПСД жана бизнес-планды даярдоо, ошондой эле "Элита" филиалынын аянтчасын 500 баш малды багып-семиртүүчү ачык аянтчага кайра багыттоо боюнча консультацияларды башташты.
Долбоордун ишке ашырылышы ири мал чарбачылыгын өнүктүрүүгө, азык-түлүк коопсуздугун камсыздоого жана региондун социалдык-экономикалык өсүшүнө өбөлгө түзөт.
