Кочкордо арзан эт жарманкеси уюштурулууда – баасы 600 сом
Кочкор районунда баалардын өсүү темпин басаңдатуу, социалдык жактан аярлуу жарандарды жеткиликтүү азык-түлүк менен камсыз кылуу, ата-мекендик өндүрүүчүлөрдү колдоо жана ички рыноктогу туруктуулукту сактоо максатында социалдык багыттагы эт жарманкеси өткөрүлүүдө. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Иш-чара Кочкор райондук мамлекеттик администрациясы, Кочкор райондук агрардык өнүктүрүү башкармалыгы, айыл өкмөттөр жана "Адал-Азык" ЖЧК “Тойбосс” ишканасы менен биргеликте уюштурулган. Жарманкенин алкагында район тургундарына 600 сомдон сапаттуу эт продукциялары сунушталат.
Социалдык колдоого багытталган иш-чара ар аптанын ишемби күндөрү саат 10:00дөн баштап өткөрүлүп, жергиликтүү калк үчүн жеткиликтүүлүктү камсыздайт.
Дареги: Кочкор районунун борборундагы автобекеттин имараты.
Кочкор райондук агрардык өнүктүрүү башкармалыгы тургундарды жарманкеге активдүү катышууга чакырат.
