Аламүдүндөгү “Р7” каналына бетон полотно төшөө иштери жүрүп жатат
Аламүдүн районунда жайгашкан “Р7” каналына бетон полотно төшөө иштери кызуу жүрүп жатат. Каналдын жалпы узундугу 4,16 км түзүп, ал 3212 гектар сугат аянтын суу менен камсыз кылат. Бул тууралуу Суу ресурстар, айыл чарба жана кайра иштетүү өнөр жайы министрлигинен билдиришти.
Бетон полотно төшөө иштери сугат суусун жоготуусуз пайдаланууга, дыйкандарга жана айыл тургундарына суу менен үзгүлтүксүз камсыз кылууга шарт түзөт. Натыйжада айыл чарба өсүмдүктөрүнүн түшүмдүүлүгү жогорулайт.
Аламүдүн райондук суу чарба башкармалыгы тарабынан каналдын жалпы 1100 метр бөлүгүнө бетон полотно төшөө пландалган. Бүгүнкү күндө 200 метрге бетон полотносу ийгиликтүү төшөлдү.
Иш-чаралардын жүрүшү айыл чарба продукциясын камсыздоону жана суу ресурстарын эффективдүү пайдаланууну жакшыртууга багытталган.
