Б.Төрөбаев: Азыр ным топтобосок – жазында түшүм аз болот
Суу ресурстары, айыл чарба жана кайра иштетүү өнөр жайы министри Бакыт Төрөбаев дыйкандарды жана фермерлерди күздүк талаа жумуштарына өзгөчө көңүл бурууга чакырды.
Министрдин айтымында, өлкөдө 1 млн 250 миң гектар айдоо жер бар, анын 800 миң гектары — сугат, 400 миң гектары — кайракы жерлер. Бирок күзгө карата жүргүзүлө турган иштер азыр өтө жай жүрүүдө.
Сугат жерлердин ичинен 62,2 миң гектарда гана күздүк айдоо жана себүү иштери аткарылган. Ным топтоо — болгону 16 миң гектарда жүргүзүлгөн. Жалпы 800 миң гектардын 78 миң гектары гана иштелип, бул 10%дан аз. Кайракы 400 миң гектардын 75 миң гектарында гана иштер жүргүзүлгөн — 18%. Министр бул көрсөткүчтөрдү өтө төмөн жана кооптуу деп баалады.
Бакыт Төрөбаев климаттык шарттардын туруксуздугуна токтолуп, мындай деди: "Жазында жаан-чачын аз болушу мүмкүн. Кар да аз жаашы ыктымал. Андай болсо суу тартыштыгы күчөйт. Азыр ным топтобосок — жазында түшүм аз болот".
Министр дыйкандарды кайракы жерлерде ным топтоо, тоңдурма айдоо жана майда арыктар аркылуу сууну кармоо иштерин тездетүүгө чакырды.
"Урматтуу дыйкандар! Күздүк талаа жумуштарына жакшылап көңүл бургула! Эртең кеч болуп калышы мүмкүн. Кыштагы ным — жаздагы түшүм", - деп кайрылды министр.
