Бишкекте ири өлчөмдөгү кибералдамчылыкка шектүү адам кармалды
Бишкекте чоң көлөмдөгү кибер алакаларды жасоого шектүү адам кармалды деп 11-декабрда Бишкек ШИИББнын басма сөз кызматы маалымдады.
Мурдараак ШИИББнын тергөө кызматына жаран У.А. кайрылып, өздөрүн УКМК, Улуттук Банк, Антикоррупциялык кызматтын кызматкерлери жана ИИМдин тергөөчүсү катары тааныштырган белгисиз адамдарга чара көрүүнү өтүнгөн.
Шектүүлөр У.А. террордук уюмдарды каржылап жатат деген шылтоо менен анын акчасын ээлеп, кийинчерээк Бишкектеги соода борборлорунун банкоматтарына котортушуп жана ал жактан чыгарып алышкан.
Бул факты боюнча КР КЖКнын 209-беренеcи (алдамчылык), 4-бөлүм, 1-пункту боюнча кылмыш иши козголуп, тергөө алдындагы текшерүү дайындалды.
Андан соң Бишкек ШИИББнын УУР кызматкерлери 2000-жылы туулган Б.Б. аттуу жаранды кармашты.
Аны Бишкек ШИИББнын убактылуу кармоочу жайына киргизишти.
Азыркы учурда Бишкек ШИИББнын «К» бөлүмүнүн кызматкерлери бул кылмышка башка тиешелүү адамдарды аныктоо максатында оперативдик-тергөө жана техникалык иштерди жүргүзүшүүдө.
