Кыргызстанда кризистик борборлорго бюджеттен 21 млн сом каралган
ЖК депутаты Венера Салямова комитеттердин жыйынында Кыргызстанда зомбулукка кабылган аялдар үчүн мамлекеттик бюджеттен каржыланган кризистик борбор бар жогуна кызыкты.
Эмгек, социалдык камсыздоо жана миграция министри Канат Сагынбаев мындай борборлор жок экенин, бирок социалдык келишимдин алкагында иштеген борборлор бар экенин айтты. Депутат зомбулук фактыларынын көбөйүшүнө байланыштуу бул маселени чечүү зарыл экенин белгиледи.
"Мындай борборлорду ачып, аялдардын укуктарын коргоо керек", — деди Венера Салямова.
Өз кезегинде Министрлер кабинетинин төрагасынын орун басары Эдиль Байсалов Бишкекте жана аймактарда бир нече шелтерлер жана кризистик борборлор иштеп жатканын маалымдады.
"Жакында өткөн “Зомбулукка каршы 16 күн” кампаниясынын алкагында биз шелтерлер менен сүйлөшүүлөрдү жүргүздүк. Алар үчүн бюджеттен 21 млн сом каралган, ал эми былтыр бул сумма 7 млн сомду түзгөн. Биз мындан да көп каражат бөлүүгө даярбыз", — деп кошумчалады ал.
