Манас шаарында ири маданий объекттер курулат
Манас шаарында 3 миң 200 орундуу филармония жана заманбап музейдин курулушу пландалууда. Бул тууралуу Министрлер Кабинетинин Төрагасы Адылбек Касымалиев бүгүн Жогорку Кеңештин жыйынында маалымдады.
Анын айтымында, соңку мезгилде маданият тармагында бир катар маанилүү иштер аткарылып, мекемелердин имараттары капиталдык оңдоодон өткөрүлүп, материалдык-техникалык базасы чыңдалды. Айрыкча Б.Бейшеналиева атындагы Кыргыз улуттук маданият жана искусство университетинин жаңы окуу корпусунун курулушуна 990 миллион сом бөлүнгөн. Ошондой эле М.Күрөңкеев атындагы музыкалык окуу жайдын окуу корпусун курууга 750 миллион сом каралган.
МинКаб Төрагасы белгилегендей, маданий инфраструктураны өнүктүрүүгө багытталган мындай долбоорлор өлкөнүн бардык аймактарында ишке ашырылууда. Мындан тышкары, 2025-жылдын 10-декабрында Кыргызстандын улуттук суусундугу – максым ЮНЕСКОнун материалдык эмес маданий мурастар тизмесине киргизилиши өлкө үчүн маанилүү жетишкендик болгон.
