ИИМ батир уурулугун алдын алууну эскертет
Жаңы жылдык эс алуу мезгилинде көптөгөн жарандар шаардан же өлкөдөн чыгып кеткендиктен, батир уурулук кылмыштарынын коркунучу жогорулайт. Кылмышкерлер көбүнчө турак жай ээлеринин узак убакытка жоктугунан пайдаланышат.
ИИМдин басма сөз кызматынын маалыматына караганда, батир уурулугун алдын алуу максатында жарандар төмөнкү коопсуздук чараларын эстен чыгарбоо керек:
- Эс алууга кетээрден мурун кире бериш эшиктердин жана терезелердин бекем жабылганын текшерүү, мүмкүн болсо кошумча кулпуларды орнотуу;
- Ачкычтарды почта кутусунда, килемченин алдында же башка оңой жеткиликтүү жерлерде калтырбоо;
- Мүмкүнчүлүк болсо, күзөт сигнализациясын жана видеобайкоо системаларын орнотуу;
- Коңшулардан же туугандардан батирди мезгил-мезгили менен көзөмөлдөп турууну өтүнүү;
- Социалдык тармактарда кетип жатканыңыз жана эс алып жаткан жериңиз тууралуу маалыматты жарыялабоо.
Мындан тышкары, турак жайды борборлоштурулган күзөт кызматына кошуу коңгуроо сигналдарына ыкчам жооп берүүнү камсыз кылып, мүлктү коргоо деңгээлин кыйла жогорулатат.
