ИИМ жарандарды дропперликке байланышкан алдамчылыктан сак болууга чакырат
Ички иштер министрлиги жарандарды дропперликке байланышкан мыйзамсыз аракеттерден сак болууга чакырды.
Дроппер – бул үчүнчү жактардын өтүнүчү менен өзүнүн банктык карталарын, эсептерин, электрондук капчыктарын же жеке маалыматтарын кылмыш жолу менен алынган акча каражаттарын которуу, накталай акчага айлантуу же жашыруу максатында пайдаланууга берген адам.
"Жеңил киреше" сунуштары көбүнчө социалдык тармактар жана мессенджерлер аркылуу таратылат. Банктык реквизиттерди, SIM-карталарды же онлайн-банкингге кирүү мүмкүнчүлүгүн үчүнчү жактарга берүү, ал тургай акчанын мыйзамсыз экенин билбесеңиз да, кылмыш жоопкерчилигине алып келиши мүмкүн.
ИИМ жарандарды шектүү сунуштардан баш тартууга жана алдамчылардын тузагына түшпөөгө чакырат.
