Былтыр коруктардагы туризмден 37,7 млн сом киреше түшкөн
Кыргызстандын мамлекеттик жаратылыш коруктары жана жаратылыш парктары 2025-жылдын жыйынтыгы боюнча каржылык жана ишмердүүлүк көрсөткүчтөрү боюнча рекорддук натыйжаларды көрсөттү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Расмий маалыматтарга ылайык, туристтик сектордон түшкөн каражат 37,7 млн сомду түзүп, өткөн жылга салыштырмалуу дээрлик эки эсеге көбөйгөн. Кирешенин өсүшү 19,3 млн сомду түздү.
Бир жыл ичинде мамлекеттик жаратылыш коруктарына жана жаратылыш парктарына 271 миңден ашык адамкелген. Экологиялык маршруттарга болгон кызыгуу 24%га өскөн.
Маалыматка ылайык, туристтердин басымдуу бөлүгүн ички туризм түзөт. Тактап айтканда, жаратылыш аймактарына 250,5 миңден ашык кыргызстандык барган. Ошол эле учурда КМШ өлкөлөрүнөн жана алыскы мамлекеттерден келген туристтердин кызыгуусу да сакталууда.
Адистердин айтымында, кирешенин өсүшү тарифтик саясатты оптималдаштыруу жана төлөмдөрдү жыйноону башкарууну жакшыртуу менен байланыштуу.
Мындан тышкары, жаратылышты коргоо мыйзамдарын сактоо боюнча көзөмөл күчөтүлгөн. Бир жыл ичинде 139 укук бузуу фактысы аныкталып, келтирилген зыяндын суммасы 1,1 млн сомду түзгөн. Окуялардын басымдуу бөлүгү өсүмдүктөр дүйнөсүнө зыян келтирүү менен байланышкан.
Учурда 78 иш боюнча каражаттар бюджетке өндүрүлүп алынып, калган материалдар соттук жана административдик кароодо турат.
