Айыл чарба министрлиги: Сапатсыз үрөн колдонгондор жеңилдиктерден куру калат
Кыргызстандын айыл чарба министрлиги фермерлерге жана дыйкандарга бардык айыл чарба өсүмдүктөрү үчүн сапат сертификаты жана келип чыгышы тастыкталган үрөн жана көчөт колдонуу милдетин киргизүүнү сунуш кылууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Бул чара контрафакттык, сапатсыз жана мыйзамсыз үрөндөрдүн жүгүртүүсүнөн келип чыккан түшүмдүн жоготууларын жана экономикалык зыянды азайтууга багытталган.
Министрлик өндүрүүчүлөргө төмөнкүлөрдү сунуш кылат:
- сертификатталган жеткирүүчүлөрдөн гана үрөн жана көчөт сатып алуу;
- сатуучулардан сапаты жана келип чыгышы тууралуу документтерди талап кылуу;
- ар бир партия үчүн сертификаттардын архивин түзүү.
Эгер фермерлер сертификаты жок үрөн колдонсо, мамлекет тарабынан берилүүчү жеңилдиктер жана колдоо чаралары берилбейт. Учурда мамлекеттик колдоо чараларынын катарына жеңилдетилген насыялар, жер участокторун бөлүү жана кооперативдерге ар тараптуу жардам кирет.
