Ишенимге кирип 25 миң $ алдап кеткен, издөөдөгү жаран кармалды
Милицияга О.А. аттуу жаран арыз менен кайрылып, 2023-жылдын ноябрь айында өзүн «Мурат» деп тааныштырган жаран сот ишине байланыштуу маселени оң жагына чечип берүүнү убада кылып, алдамчылык жолу менен 25 000 АКШ доллары өлчөмүндөгү акча каражатын ээлеп алганын билдирген.
ИИМдин басма сөз кызматынан кабарлагандай, акчаны алгандан кийин шектүү белгисиз багытта изин жашырып кеткен. Аталган факты боюнча КРнын Кылмыш-жаза кодексинин 209-беренеси (Алдамчылык) менен кылмыш иши козголгон.
Жүргүзүлгөн ыкчам-издөө иш-чараларынын алкагында ИИМдин Кылмыш иликтөө башкы башкармалыгынын кызматкерлери тарабынан Ош облусунун Өзгөн районундагы Ак-Кыя айылында 2024-жылдан бери издөөдө жүргөн, мурда бир нече жолу соттолгон жана уюшкан кылмыштуу топтун мүчөсү болуп эсептелген 1970-жылы туулган С.М. аттуу жаран кармалган.
Шектүүгө карата камакка алуу түрүндөгү бөгөт коюу чарасы тандалып алынган.
