Октябрь районунда эт бааларына рейд өткөрүлдү
Кечээ Бишкек шаарынын Октябрь районунда эт бааларына көзөмөл жүргүзүү боюнча кезектеги рейд өткөрүлдү. Бул тууралуу муниципалитеттен билдиришти.
Иш-чарага Октябрь райондук администрациясынын, мэриянын муниципалдык инспекциясынын, Октябрь РИИБинин жана №403 МАБдын кызматкерлери катышты. Рейддин алкагында "Орто-Сай" базарындагы сатуучуларга социалдык мааниге ээ азык-түлүк товарларына бааларды мамлекеттик жөнгө салуунун тартиби түшүндүрүлдү. Сөөктүү уй этине чекене баа 1 килограммына 680 сомдон ашпоого тийиш экени эскертилди.
Сатуучулардын айтымында, уй эти дүңүнөн 690–700 сомдон, кой эти 750 сомдон алынууда. Мындан улам белгиленген баа менен сатууда кыйынчылыктар жаралып жатканы белгиленди. Ошондой эле эттин дүң жеткирүүчүлөрүнүн бааларын жөнгө салуу маселеси көтөрүлдү.
Текшерүү учурунда баа белгилеринин жоктугу жана этти белгиленген чектен жогору сатуу фактылары аныкталды. Сатуучуларга түшүндүрүү иштери жүргүзүлдү. Буга чейин "Орто-Сай" базарында баа талаптарын бузгандыгы үчүн 29 миң сомго 3 протокол түзүлгөн.
Мындан тышкары, Карагул Акмат көчөсүндөгү "Устукан" дүкөнүнө да айып пул салынды. Рейддер Экономика жана коммерция министрлигине караштуу Монополияга каршы жөнгө салуу кызматынын буйругунун алкагында жүргүзүлүп, текшерүүлөр күн сайын улантылууда.
