ЖК комитетинде Жогорку технологиялар паркынын келечеги талкууланды
Бүгүн Жогорку Кеңештин Илим, билим берүү, инновациялык өнүгүү жана маалыматтык технологиялар, маданият, спорт жана жаштар иштери боюнча комитетинин жыйынында "Кыргыз Республикасынын Жогорку технологиялар паркынын дирекциясы" мекемесинин ишмердүүлүгү тууралуу маалымат угулду.
Маалыматты мекеменин директору Азис Абакиров тааныштырды. Ал өлкөдө IT-сектор активдүү өнүгүп жатканын, кыргыз программисттери эл аралык рынокто суроо-талапка ээ болуп жатканын белгиледи.
Талкуу маалында депутаттар IT-секторду өнүктүрүү, аймактарга инвестиция тартуу, салыктык төлөмдөр, Жогорку технологиялар паркынын кирешелери жана резиденттердин иши тууралуу суроолорду көтөрүштү. Ошондой эле кыргыз-жапон санарип университетин ачуу демилгеси жана өлкөдөгү IT-адистердин саны боюнча маселелер айтылды.
Комитет төрайымы Токтобүбү Ашымбаева Жогорку технологиялар паркы ЖОЖдордогу стартаптарды колдоого, ошондой эле "Алтын түйүн" улуттук балдар инженердик-техникалык академиясы менен кызматташууга өзгөчө көңүл буруусу зарылдыгын белгиледи. Депутаттар кыргыз тилин өнүктүрүү жана жаңы IT-адистерди колдоо маселелерине да токтолушту.
