Аламүдүн районунун Бер-Булак айылында жаңы мектеп ачылды
Бүгүн, Чүй облусуна караштуу Аламүдүн районунун Бер-Булак айылында 275 орундуу О. Турсуматов атындагы жаңы мектептин салтанаттуу ачылыш аземи болуп өттү. Бул тууралуу Курулуш, архитектура жана турак жай-коммуналдык чарба министрлигинен билдиришти.
Билдирүүгө караганда, ишчарага Курулуш, архитектура жана турак жай-коммуналдык чарба министри Нурдан Орунтаев, Чүй облусундагы ыйгарым укуктуу өкүлү Азамат Осмонов, жергиликтүү мамлекеттик органдардын өкүлдөрү, мугалимдер, окуучулар жана айыл тургундары катышкан.
Анын жүрүшүндө Курулуш, архитектура жана турак жай-коммуналдык чарба министри Нурдан Орунтаев сөз сүйлөп, өлкө боюнча курулуп жаткан мектептердин саны жана сапаты жылдан жылга жогорулап жатканын белгиледи.
О. Турсуматов атындагы мектептин курулушу 2024-жылы республикалык бюджеттин эсебинен башталган. Долбоорго ылайык, мектеп эки кабаттан туруп, окуучулар жана мугалимдер үчүн бардык ыңгайлуу шарттар каралган.
Белгилей кетсек, Президенттин тапшырмасынын негизинде Чүй облусунун Таш-Дөбө айылында бир катар социалдык объектилердин курулушу аяктап, бүгүнкү күндө пайдаланууга берилди.
