Тамак-ашка буйрутма бергендерге 10% арзандатуу киргизилет
Экономика жана коммерция министрлигине караштуу Монополияга каршы жөнгө салуу кызматы Бишкек шаарындагы кафе жана ресторандардын өкүлдөрү менен коомдук тамактануу кызматтарынын бааларын түзүү маселеси боюнча тегерек стол өткөрдү.
Министрликтен билдиришкендей, жолугушууда 2026-жылдын 1-январынан тартып күчүнө кирген Өкмөттүн №560 токтомуна киргизилген өзгөртүүлөр талкууланып, тейлөө үчүн өзүнчө акы алууга тыюу салынары жана бардык чыгымдар менюда көрсөтүлгөн баага киргизилиши керектиги белгиленди.
Монополияга каршы жөнгө салуу кызматы бааларды негизсиз жогорулатууга жол берилбестигин эскертип, айрым жайларда баалар 15%дан ашык өскөнүн билдирди.
Ишкерлер тейлөө акысы өзүнчө алынбай турганын тастыктап, баалардын өсүшүн ижара, коммуналдык кызматтар, азык-түлүк жана башка чыгымдардын көбөйүшү менен байланыштырышты.
Жыйынтыгында тараптар бааларды оптималдаштыруу жана тамакты алып кетүү же буюртма кылуу үчүн 10% арзандатуу киргизүү боюнча макулдашты.
