"Достук-автожол" өткөрмө пунктунун жетекчиси системалуу коррупция үчүн кармалды
УКМК Ош облусундагы Чек ара кызматына караштуу "Достук-автожол" көзөмөл-өткөрүү пунктунун жетекчисин системалуу коррупцияга шектүү катары кармаганын кызматтын басма сөз борбору билдирди.
Маалыматка ылайык, 2026-жылдын 2-февралында коррупциялык схемаларга каршы жүргүзүлгөн иш-чаралардын алкагында А.Н.О. деген кызматкер кармалган. Тергөө анын өткөрмө пунктунда атайылап кезектерди жаратып, андан соң ортомчулар аркылуу чет өлкөлүк жарандарды мамлекеттик чек арадан тоскоолдуксуз өткөрүп берүү үчүн туруктуу негизде акча каражаттарын алып турганын аныктаган.
Мындан тышкары, УКМКнын маалыматына караганда, кармалган кызматкер чек арадагы мыйзамсыз иштерге тиешеси бар айрым адамдарга колдоо көрсөтүп келген. Ал УКМКнын тергөө абагынын убактылуу кармоо жайына камалды.
Учурда кылмышка тиешеси бар башка кызмат адамдарын аныктоого багытталган активдүү тергөө-ыкчам иш-чаралар улантылууда. Ошол эле учурда бардык жарандар үчүн мамлекеттик чек арадан коопсуз жана ыңгайлуу өтүү шарттарын түзүү боюнча иштер жүргүзүлүп жатканы маалымдалды.
