Парламентте аймактардагы социалдык-экономикалык маселелер көтөрүлдү
Жогорку Кеңештин депутаттары бүгүн, 4-февралдагы "Ар кандай маселелер" саатында өлкө аймагындагы бир катар социалдык-экономикалык көйгөйлөрдү көтөрүштү. Бул тууралуу Жогорку Кеңештин басма сөз кызматы билдирди.
Депутат Дастан Бекешев Казакстанда жана Россияда жашаган кыргыз жарандары чет элдик номердеги автоунаалары менен өлкөгө кире албай жатканын белгилеп, бул механизмдерди кайра карап чыгуу жана унааларды мыйзамдаштырууга мүмкүнчүлүк берүү зарылдыгын айтты.
Депутат Сүйүнбек Өмүрзаков күмөндүү реабилитациялык борборлордун ишмердүүлүгүн токтотууга чакырып, аз камсыз болгон үй-бүлөлөр үчүн жөлөкпулдун өлчөмүн көбөйтүп, алуу тартибин жөнөкөйлөтүүнү сунуштады.
Аймактык маселелерди көтөргөн депутаттар мектеп, жол, бала бакча, таза суу жана газдаштыруу көйгөйлөрүнө токтолушту. Айрыкча Ош, Баткен, Ноокат, Кара-Суу, Лейлек, Алай жана Талас аймактарындагы социалдык объектилердин абалы айтылды.
Ошондой эле жаш балдардын сууга чөгүп каза болуусунун алдын алуу, сугат суу долбоорлорун колдоо, ички жолдорду кар тазалоо иштерин күчөтүү жана таза суу менен камсыздоо маселелери боюнча тийиштүү мамлекеттик органдарга кайрылуулар жасалды.
