Бишкекте курулуш эрежелерин бузган компанияга 200 миң сом айып салынды
Курулуш, архитектура жана турак жай-коммуналдык чарба министри Нурдан Орунтаевдин тапшырмасы менен өлкө аймагындагы курулуш объектилерине карата рейддик текшерүүлөр улантылып жатат. Бул тууралуу ведомстводон билдиришти.
Министрликке караштуу Мамлекеттик архитектура-курулуш контролдоо департаментинин Бишкек шаардык башкармалыгынын инспекторлору борбор калаадагы курулуш объекттерин текшеришти.
Текшерүү учурунда Токмок көчөсү 59 дарегинде курулуп жаткан 3 кабаттуу соода борборунда курулуш эрежелери бузулганы аныкталды. Натыйжада, курулуш иштерин жүргүзүп жаткан "Сапат Хаус" ЖЧКсына карата Кыргыз Республикасынын Укук бузуулар жөнүндө кодексине ылайык протокол түзүлүп, 200 000 сом айып салынды. Ошондой эле мыйзам бузууларды жоюу боюнча жазуу түрүндөгү эскертүү берилди.
Министрлик эскертет: бардык курулуш иштер Кыргыз Республикасынын мыйзамдарына жана курулуш нормаларына ылайык жүргүзүлүшү керек. Эгер талаптар сакталбаса, тиешелүү укуктук чаралар көрүлөт жана бардык текшерүүлөр ачык-айкын, мыйзам чегинде жүргүзүлөт.
