Оштогу борбордук стадиондун курулуш иштерине текшерүү жүргүзүлдү
Ош шаарындагы А. Суюмбаев атындагы борбордук стадиондун курулуш иштери боюнча видео кайрылуу түшкөн. Анын негизинде 6-февралда Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Ош региондук башкармалыгы объектте текшерүү жүргүздү. Бул тууралуу Ош шаарынын мэриясынан билдиришти.
Текшерүү учурунда трибуналардагы негизги темир-бетон конструкцияларында конструктивдик бузулуулар жана кооптуу жагдайлар аныкталган жок. Анкердик элементтердин коррозиясын алдын алуу максатында гана кошумча бетон катмары колдонулган.
Ошол эле учурда колдонулган бетондун маркасы техникалык талаптарга жооп бербегени аныкталып, сапатсыз катмарлар толук алынды. Курулуш иштерин жүргүзгөн “Универсал Компани ЛТД” ЖЧКсына кемчиликтерди жоюу боюнча жазуу жүзүндө көрсөтмө берилди.
Учурда көрсөтмөгө ылайык оңдоо жана калыбына келтирүү иштери жүргүзүлүүдө.
