Б.Төрөбаев: 3 жылда Ысык-Көл облусунда таза суу маселеси чечилет
Ысык-Көл облусунда таза суу маселеси 3 жылдын ичинде толук чечилерин МинКаб төрагасынын орун басары Бакыт Төрөбаев Тору-Айгыр айылында курулган таза суу объектисинин билдирди.
"Акыркы эки жылдын ичинде биз бул жоопкерчиликти толугу менен өзүбүздүн мойнубузга алдык. Бүгүнкү күндө Кыргызстан боюнча 600 айылда таза суу системаларын куруу иштери башталды. Бул — мамлекеттин элдин турмуш сапатын жакшыртууга багытталган приоритеттүү саясатынын жыйынтыгы", — деди Бакыт Төрөбаев.
Министр белгилегендей, таза суу жана саркынды суу объекттерин куруу жана модернизациялоо иштери президент Садыр Жапаровдун демилгеси менен кабыл алынган 2030-жылга чейинки Улуттук өнүктүрүү программасынын алкагында ишке ашырылууда. 2021-жылдан бери бул тармакка республикалык бюджеттен жана инвестициялык булактардан жалпы 512 млн доллар тартылган.
"Учурда 600 айылда жана 25 шаарда курулуш долбоорлору иштелип чыгып, 40 айылда таза суу системалары курулуп жатат. Ошондой эле 3 шаарда саркынды сууларды чыгаруу үчүн канализациялык системалар салынып жатат.
Ысык-Көл облусу боюнча учурда 72 айылда таза суу маселеси толук чечиле элек. Алардын ичинен 15 айыл Ак-Суу районунда жайгашкан. Калган айылдар боюнча техникалык-экономикалык негиздемелер даярдалып, экспертизадан өткөрүлүүдө. Министрдин айтымында, үч жылдын ичинде Ысык-Көл облусундагы таза суу маселеси толук чечилет", - деди ал.
