Мамлекеттик транспорттук каражаттарды каттоо борборунун кызматкерлери кармалды
Бишкек шаардык Мамлекеттик транспорттук каражаттарды каттоо борборунун үч кызматкери кармалганын Чүй облустук ИИМинин басма сөз кызматы билдирди.
Буга чейин аймактык ИИМдин кызматкерлери жеке автомектептерди бүтүрүү тууралуу жалган күбөлүктөрдү жасаган кылмыштуу топ аныкталганын билдиришкен. Бул топтун директорлору Б.Т. жана М.А. ортомчу И.Т. аркылуу жасалма окутуу үчүн 40 миңден 120 миң сомго чейин акча алышкан. Кылмышкерлер жарандарды мамлекеттик портал аркылуу каттап, курсту өпөстөн жасалма документтерди беришкен. Бир ортомчу аркылуу 244 курсант катталып, мыйзамсыз түрдө 2 млн 760 миң 850 сом алынган.
Бул факты боюнча Кылмыш кодексинин 379-беренеси менен кылмыш иши козголду. Кылмыштуу топтун уюштуруучулары — үч жаран кармалды.
Текшерүү-оперативдик иштердин жүрүшүндө мурда кармалган И.Т. баштаган бул топ кошуна мамлекеттерден келген унааларды жасалма документтер менен мыйзамсыз каттоо иштерин уюштургандыгы аныкталды. Бул аракеттер Мамлекеттик транспорттук каражаттарды каттоо жана айдоочуларды каттоо борборунун кызматкерлери менен кызматташтыкта жүргүзүлүп, алар жасалма күбөлүктөр жана каттоо документтерин колдонуп маалыматтарды базаларга киргизип, транспортту каттоодон өткөрүшкөн.
Кийинки текшерүү-оперативдик иштерде борбордун Бишкек шаардык бөлүмүнүн кызматкерлеринин бул мыйзамсыз аракеттерге тиешеси аныкталды. Атап айтканда, транспорттук каражаттарды мыйзамсыз каттоого башкы адис С.Д. жана адистер К.У. менен У.А.нын тиешеси бар экени белгиленди.
Бардык аталган адамдар КРнын ЖПКнын 96-беренеси боюнча кармалып, убактылуу кармоочу жайга жайгаштырылды. Сот аларга бир айлык камак түрүндөгү бөгөт чарасын кабыл алды.
