Быйыл Ош шаарында 10 жаңы мектеп курулат
Бүгүн Ош шаарынын мэри Жеңишбек Токторбаев жана Курулуш, архитектура жана турак жай-коммуналдык чарба министри Нурдан Орунтаевдин катышуусунда Ош шаарында курула турган жаңы мектептер боюнча жумушчу жыйын өттү.
Ош шаардык мэриясынан билдиргендей, жыйында 2026-жылы курулушу пландалган 10 мектептин долбоорлору, курулуш аймактары, инфраструктуралык камсыздоо, курулуш иштеринин этаптары жана мөөнөттөрү талкууланды. Жер тилкелеринин даярдыгы, долбоордук-сметалык документтердин тактыгы жана курулуш сапатын камсыз кылуу маселелерине өзгөчө көңүл бурулду.
Жыйындан кийин мэр жана министр тиешелүү кызматтардын жетекчилери менен биргеликте курула турган мектептердин аймактарын жеринен көрүп чыгышты. Социалдык объектилер заманбап талаптарга жооп бериши, сапаттуу материалдар колдонулушу жана курулуш иштеринде ачык-айкындык менен жоопкерчилик камсыздалышы керектиги белгиленди.
Белгилей кетсек, Президент Садыр Жапаровдун тапшырмасына ылайык, 2026-жылы республикалык бюджеттин эсебинен Ош шаарында 10 мектеп курулат. Анын ичинде С. Жигитов атындагы (Карл Маркс) жана М. Ломоносов атындагы мектептердин эски имараттары толугу менен бузулуп, ордуна жаңы заманбап мектептер салынат.
Аталган мектептерди 2026-жылдын 1-сентябрына чейин толук бүтүрүп, пайдаланууга берүү пландалууда.
