№61 мектептин жанындагы курулуш объектисиндеги иштер токтотулду

КРнын Курулуш, архитектура жана турак жай-коммуналдык чарба министрлигине Бишкек шаарындагы №61 жалпы билим берүүчү орто мектепке чектеш жайгашкан 14 кабаттуу турак жай объектисинде курулуш иштери жүргүзүлүп жаткандыгы тууралуу кайрылуу келип түшкөн.

Министрликке караштуу Мамлекеттик архитектура-курулуш контролдоо департаментинин директору Эрназарбек Суерекулов билдирүүсүнө караганда, бул объектиде курулуш иштери буга чейин токтотулган. Бүгүнкү күндө куруучулар тарабынан курулуш аянтын консервациялоо иш-чаралары жүргүзүлмөк. Бирок “Action” ЖЧКсы курулуш объектисинде бетон кую иштерин баштап жаткандыктан, анан иши токтотулуп, курулуш объектисине министрлик тарабынан мөөр басылып жабылды.

Белгилей кетсек, мындан бир нече күн мурда Курулуш министри Нурдан Орунтаевдин тапшырмасына ылайык, аталган мектепке чектеш объекттеги курулуш иштери токтотулган.

Учурда тиешелүү мамлекеттик органдар тарабынан объекттин мыйзамдуулугу жана балдардын коопсуздугу боюнча кошумча текшерүүлөр жүргүзүлүүдө.