Советтик аскерлердин Афганистандан чыгарылган күнүнө арналган митинг-реквием болду
Бишкектеги советтик аскерлердин Афганистандан чыгарылгандыгынын 37 жылдыгына арналган митинг-реквием болуп өттү. Коргоо министрлигинин билдирүүсүнө караганда, ишчара Бишкек шаарындагы Ата-Түрк атындагы сейил бакта интернационалист жоокерлердин мемориалында болду.
Министрликтин маалыматына ылайык, курман болгондорду эскерүүгө ардагерлер, жоокерлердин туугандары, коргоо министринин орун басары Алмазбек Кулмурзаев, Бишкек шаарынын мэри Айбек Жунушалиев, Россиянын Кыргызстандагы элчилигинин коргоо маселелери боюнча аскердик атташеси Игорь Довбня жана башкалар катышышты.
Коргоо министринин орун басары “Афган согушунун ардагерлеринин республикалык кеңеши” коомдук бирикмесинин мүчөлөрүнө ыраазычылык жарыялап, аларга өкмөт башчысынын резервдик фондунан каржылык колдоо көрсөтүү максатында 250 миң сом бөлүнгөнүн белгиледи.
Митинг “Жоокер-интернационалисттерге” арналган эстеликке гүлчамбар жана гүл коюу менен жыйынтыкталды.
Эске салсак, 1989-жылдын 15-февралында советтик аскерлердин акыркы бөлүгү Афганистандан чыгарып алынган.
