Бишкек базарларында уй эти 800 сомдон сатылып жатканы аныкталды
15-февралда Экономика министрлигине караштуу Монополияга каршы жөнгө салуу кызматы жергиликтүү администрациялар жана базарлардын жетекчилиги менен биргеликте Бишкек шаарындагы базарларда түшүндүрүү рейддерин өткөрдү. Бул тууралуу ведомстводон билдиришти.
Иш-чара 2026-жылдын 31-январынан тарта уй жана кой этинин (сөөксүз эттен башка) баасына убактылуу мамлекеттик жөнгө салуу киргизилгенине байланыштуу уюштурулган.
Маалыматка ылайык, мониторинг Аламедин, Ош жана Орто-Сай базарларында жүргүзүлгөн. Текшерүүнүн жыйынтыгында эттин чекене базар баасы орточо эсеп менен 1 кг үчүн 680 сомду түзгөн.
Ошол эле учурда айрым соодагерлердин этти 700, 780 жана 800 сомдон сатып жаткан учурлары аныкталган. Мындай сатуучуларга эскертүү берилип, мыйзам бузуу кайталанган учурда Кыргыз Республикасынын Укук бузуулар жөнүндө кодексине ылайык жоопкерчилик чаралары колдонулары түшүндүрүлгөн.
Антимонополия кызматы сатуучуларга "Керектөөчүлөрдүн укуктарын коргоо жөнүндө" мыйзамдын талаптарын эске салды. Ага ылайык, соода түйүндөрүндө баалар расмий үлгүдөгү баа белгилери менен көрсөтүлүшү керек, кол менен жазылган кагаздарга жол берилбейт. Ошондой эле таразалардын текшерүүдөн өтүшү жана алардын жарактуулук мөөнөтү да көзөмөлдөндү.
Ведомствонун маалыматына караганда, мындай рейддик иш-чаралар республика боюнча ар кайсы соода түйүндөрүндө күн сайын жүргүзүлүп турат.
