Бишкекте мессенджер аркылуу 1 млн сомдой акча алдаган шектүүлөр кармалды

Бишкек шаарынын ИИББнин Кылмыш иликтөө башкармалыгы мессенджерлерди колдонуп уюштурулган алдамчылык схемасын токтотконун билдирди.

Маалыматка ылайык, 2025-жылдын 23-сентябрында белгисиз адамдар WhatsApp аркылуу өздөрүн УКМК, ИИМ жана Улуттук банктын кызматкерлери катары тааныштырышып, жабырлануучудан 988 миң сом өлчөмүндө акча алдап алышкан.

Иш Биринчи Май райондук ИИБ тарабынан Кыргыз Республикасынын Кылмыш-жаза кодексинин 209-беренеси (алдамчылык) менен тергелүүдө. Жүргүзүлгөн ыкчам-тергөө иштеринин жүрүшүндө Э.Б. (1999) жана Д.С. (2005) аттуу шектүүлөр кармалып, убактылуу кармоо жайына киргизилди.

Учурда кылмышка тиешеси бар башка адамдарды аныктоо жана жагдайларды тактоо боюнча кошумча тергөө иштери жүргүзүлүүдө.

ИИББ жарандарды сак болууга чакырат жана телефон же интернет аркылуу өзүн мамлекеттик кызматкер катары тааныштырган адамдарга акча бербөөгө эскертет.