Бишкектин айрым аймактарында убактылуу суу өчөт
2026-жылдын 24-мартында саат 09:00дөн 24:00гө чейин турак жай имараттарына, мектептерге, мектепке чейинки билим берүү мекемелерине, саламаттыкты сактоо мекемелерине жана башка социалдык жана өнөр жай объектилерине ичүүчү суу берүү токтотулат.
Шаардык мэриянын басма сөз кызматынын билдирүүсүнө караганда, суу берүүнү токтотуунун себеби «Северный» суу топтомосунда жана шаардык суу түтүк тармактарында оңдоо иштерин жүргүзүүгө байланыштуу болуп жатат.
Өчүрүү аймагы, кийинки көчөлөр менен чектешет: Күрөңкеев көчөсү, Абдрахманов көчөсү, Элебесов көчөсү, Бельская көчөсү, Ала-Арча суусу, Жибек Жолу проспектиси, Жаш Гвардия бульвары, ЧЧК, Саадаев көчөсү.
Ошондой эле: Красный Строитель, Ак-Тилек, Көлмө, Алтын Бешик, Салам Алик турак жай конуштары.
“Бишкексууканал” МИси ыңгайсыздык жараткандыгы үчүн кечирим сурайт жана ишканалар менен тургундарды ичүүчү сууну алдын ала камдап алууну сунуштайт.
