"Алга" стадиону жеке менчикке өттүбү? Мэрия түшүндүрмө берди
Бишкек шаарынын мэриясы "Алга" стадионун пайдалануу тартиби жана анын макамы боюнча тараган маалыматтарга түшүндүрмө берди. Бул тууралуу муниципалитеттен билдиришти.
Маалыматка ылайык, стадион аймагында батыш, борбордук жана чыгыш кире бериштер каралган. Батыш тарабы спорт секцияларына катышкан балдар үчүн, чыгыш тарабы студенттер жана шаар тургундары үчүн ачык. Борбордук кире бериш аркылуу кирүү каралган эмес.
Чуркоо жолдору күн сайын саат 06:00дөн 11:00гө чейин бардык каалоочулар үчүн жеткиликтүү. Ал эми саат 11:00дөн 19:00гө чейин футбол машыгууларына байланыштуу кирүүгө чектөө коюлат. Ошондой эле коопсуздук максатында футбол талаасына чыгууга тыюу салынат. Үй матчтары учурунда чуркоо жолдору толугу менен жабылат.
Мэрия стадион жеке менчикке өттү деген маалымат чындыкка дал келбесин белгиледи. Объект муниципалдык менчик болуп саналат жана мэриянын балансында турат.
Ошондой эле жарандардан белгиленген эрежелерди сактоо жана коопсуздук чараларына түшүнүү менен мамиле кылуу өтүнүлдү.
