Кыргызстанда жеке маалыматтарды мыйзамсыз иштетүүгө 120 миң сомго чейин айып пул салуу каралып жатат
Жогорку Кеңешине Укук бузуулар жөнүндө кодекске өзгөртүүлөрдү киргизүү тууралуу мыйзам долбоору сунушталды. Ал жеке маалыматтар чөйрөсүндөгү мыйзам бузуулар үчүн жоопкерчиликти күчөтүүгө багытталган.
Документ жаңы берене киргизүүнү карайт. Ага ылайык, жеке маалыматтарды мыйзамсыз иштетүү, сактоо, өткөрүп берүү жана таратуу үчүн жоопкерчилик белгиленет.
Тактап айтканда, жеке маалыматтарды коргоо талаптарын бузгандыгы үчүн:
- жеке жактарга — 7,5 миң сом айып пул,
- юридикалык жактарга — 65 миң сом айып пул салуу сунушталууда.
Кайрадан (кайталанып) бузуу болгон учурда айып пулдар төмөнкүдөй көбөйөт:
- жеке жактар үчүн — 25 миң сомго чейин,
- юридикалык жактар үчүн — 120 миң сомго чейин.
Ошол эле учурда мыйзам долбоору менен учурдагы айрым нормаларды (4132–4135-беренелерди) күчүн жоготту деп таануу сунушталууда, анткени алар жаңы жөнгө салууну кайталап жатат.
Түшүндүрмө катта белгиленгендей, бул өзгөртүүлөр мыйзамдарды Санариптик кодекске шайкеш келтирүү максатында киргизилүүдө. Аталган кодекс жеке маалыматтарды иштетүү жана коргоо маселелерин системалуу түрдө жөнгө салат. Мындан тышкары, айып пулдардын чектери такталып, мындай укук бузууларды караган органдардын ыйгарым укуктары кайра бөлүштүрүлөт.
Долбоордун демилгечилери белгилегендей, мыйзам долбоору негизинен редакциялык-техникалык мүнөзгө ээ болуп, нормалардын кайталоосун жоюп, санариптик маалыматтар тармагында укуктук аныктуулукту жогорулатат.
