1-класска кабыл алуу: Бишкекте эмне үчүн бир нече мектептин ичинен тандоого болбойт?
2026/27-окуу жылына карата Бишкек шаарындагы жалпы билим берүү уюмдарына окуучуларды каттоо тартибине өзгөртүүлөр киргизилгенин Билим берүү министрлиги билдирди.
Маалыматка ылайык, 2025/26-окуу жылында 12 жылдык билим берүү системасын этап-этабы менен киргизүүгө жана бир эле учурда 1- жана 2-класстарга кабыл алуу жүргүзүлгөндүгүнө байланыштуу айрым мектептерде орун жетишсиздиги жаралган. Бул кырдаалды жөнгө салуу үчүн микроаймак (зоналык бөлүштүрүү) принциби киргизилген.
2026/27-окуу жылында жаңы тартипке ылайык, каттоо ар бир мектепке бекитилген микроаймак боюнча гана жүргүзүлөт.
Бул чечим Бишкек шаарынын мэриясынын билим берүү департаментинин кайрылуусунун негизинде кабыл алынган. Киргизилген өзгөртүүлөр борбор калаада калктын жыш жайгашуусун эске алуу менен мектептерге түшкөн жүктү тең бөлүштүрүүгө багытталган.
Буга чейин ата-энелердин бири 1-класска каттоодо мектепти тандоо мүмкүнчүлүгүнүн чектелгенине нааразы болгон.
