Бишкекте Дэн Сяопин проспектисинде демонтаж иштери башталды
Бишкек шаарында Дэн Сяопин проспектисинин Патрис Лумумба көчөсүнөн Кустанай көчөсүнө чейинки тилкесинде жайгашкан объекттерди демонтаждоо иштери башталды. Бул тууралуу мэриядан маалымдашты.
Шаар мэриясынын комиссиясынын чечими менен 13 чарба субъект менен түзүлгөн келишимдерди токтотуу каралган. Учурда алардын ичинен 10 объект боюнча келишимдер буга чейин токтотулуп, калган 3 объект боюнча акыркы чечим кабыл алынууда.
Маалым болгондой, өткөн кыш мезгилинде Жер пайдаланууну контролдоо башкармалыгы тарабынан эскертмелер берилип, ээлеп турган аймакты ыктыярдуу бошотуу үчүн мөөнөт белгиленген.
Демонтаж иштери аяктагандан кийин бошотулган аймак жашылдандырылып, көрктөндүрүлөт.
