Өзгөн жана Кызыл-Кыяда суу жана канализация системалары жаңыланды
Экономика жана коммерция министрлигинин орун басары Медербек Туманов Өзгөн жана Кызыл-Кыя шаарларында суу менен камсыз кылуу жана канализация системаларын реабилитациялоо долбоорлорунун аякташына арналган иш-чараларга катышты. Бул тууралуу ведомстводон билдиришти.
Иш-чарага Европа Биримдигинин Кыргызстандагы Элчиси Реми Дюфло да катышты.
Долбоорлордун алкагында суу инфраструктурасы жаңыланып, кызмат көрсөтүүнүн сапаты жана ишенимдүүлүгү жогорулады. Ошондой эле калктын борборлоштурулган кызматтарга жеткиликтүүлүгү кеңейип, суунун жоготуусу азайып, экологиялык абал жакшырды.
Медербек Туманов белгилегендей, базалык инфраструктурага инвестициялар аймактардын өнүгүшүнө өбөлгө түзүп, ишкердик чөйрөнү жакшыртат жана чакан жана орто бизнес үчүн шарттарды кеңейтет.
Жыйынтыгында кызмат көрсөтүүлөрдүн сапатын мындан ары жогорулатуу, калкты камтууну кеңейтүү жана заманбап башкаруу технологияларын киргизүү зарылдыгы белгиленди.
