Сузакта курулуш талаптары сакталбаган мунай заводуна 400 миң сом айып салынды
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Жалал-Абад региондук башкармалыгы Сузак районунун Курук-Сай участогунда жайгашкан мунайды кайра иштетүүчү заводдун курулушун текшерди.
Ведомствонун маалыматка ылайык, аталган объекттин курулушу боюнча буга чейин — 2026-жылдын 27-январында — долбоордук-уруксат берүүчү документтери жана тиешелүү экспертизалык корутундулары жок экени аныкталып, көрсөтмө берилген. Ошондой эле “Орис НПЗ” ЖЧКсына 200 миң сом айып пул салынган.
Апрель айындагы кайра текшерүүнүн жыйынтыгында көрсөтмөлөр аткарылбаганы жана курулуш иштери талаптарды бузуу менен улантылып жатканы белгилүү болду. Натыйжада компанияга кайрадан протокол түзүлүп, дагы 200 миң сом айып пул салынды.
Белгиленгендей, мунайды кайра иштетүү сыяктуу өндүрүштүк объекттерди зарыл экспертизасыз жана техникалык көзөмөлсүз куруу аймактын экологиялык жана техникалык коопсуздугуна коркунуч жаратышы мүмкүн.
