Кыргызстан халал индустриясында эл аралык позициясын бекемдөөдө
Экономика жана коммерция министрлигине караштуу Кыргыз аккредитация борборунун директору Айнура Ахмеджанова Түркиянын Анкара шаарында өтүп жаткан I Эл аралык халал-аккредитация конгресске (1st International Halal Accreditation Congress) катышууда.
Ведомствонун маалыматына ылайык, конгресс 2026-жылдын 6–8-апрель күндөрү өтүп, Түркиянын Халал-аккредитация агенттиги (HAK) тарабынан уюштурулууда. Бул форматтагы алгачкы ири эл аралык иш-чара болуп саналат.
Иш-чара дүйнөнүн ар кайсы өлкөлөрүнөн келген илимпоздорду, индустрия өкүлдөрүн жана мамлекеттик органдарды бириктирген глобалдык платформа болуп эсептелет.
Конгресстин алкагында халал сертификаттарын өз ара таануу механизмдери, продукциянын жана кызмат көрсөтүүлөрдүн сапатын контролдоонун инновациялык ыкмалары талкууланып, эл аралык уюмдар менен өнөктөштүк байланыштарды бекемдөө маселелери каралууда.
Белгилей кетсек, халал чөйрөсүндөгү сапат инфраструктурасын өнүктүрүү Кыргызстандын экспорттук мүмкүнчүлүктөрүн кеңейтүүгө жана улуттук аккредитация системасынын эл аралык деңгээлдеги аброюн жогорулатууга өбөлгө түзөт.
