ШКУ-2026 марафонун уюштурууга 2 млн сом бөлүнөт
Дене тарбия жана спорт мамлекеттик агенттиги ШКУ-2026 эл аралык марафонун уюштуруу кызматтарын сатып алуу боюнча тендер жарыялады.
Мамлекеттик сатып алуулар порталынын маалыматына ылайык, бул максатка 2 млн 150 миң сом бөлүү пландалууда.
Анын ичинде:
- 1 млн 250 миң сом Ысык-Көл облусунун Бактуу-Долоноту айылында өтө турган марафондун ачылыш жана жабылыш аземдерин уюштурууга;
- 900 миң сом чет өлкөлүк катышуучуларды, уюштуруу комитетин, калыстарды, ыктыярчыларды жана машыктыруучуларды (жалпы 150 адам) эки суткага мейманканага жайгаштыруу жана үч маал тамак-аш менен камсыз кылууга каралган.
Жеткирүүчүлөрдүн сунуштары 13-апрелге чейин кабыл алынат.
