Ысык-Көлдүн Туура-Суу айылында селден коргоочу дамба курулду
Ысык-Көл облусунун Тоң районунун Туура-Суу айылында Зындан тоо көлүнөн коргоочу 284 метрлик дамба курулуп, пайдаланууга берилди. Бул тууралуу ӨКМден билдиришти.
Курулуш иштери Өзгөчө кырдаалдар министрлигинин Аймактарды коргоо боюнча региондор аралык борбору тарабынан жүргүзүлүп, ЮНЕСКОнун GLOFCA долбоору аркылуу каржыланды. Бул долбоор Борбор Азия өлкөлөрүндө калктын климаттык өзгөрүүлөргө байланыштуу тобокелдиктерге туруктуулугун жогорулатууга багытталган.
Акыркы жылдары мөңгүлөрдүн эриши жана мөңгү көлдөрүнүн көбөйүшү алардын жырылып кетүү коркунучун күчөтүп, тоолуу аймактардагы калкка жана инфраструктурага олуттуу коркунуч жаратууда. Курулган дамба Туура-Суу айылын жана жакынкы аймактарды сел коркунучунан коргоодо маанилүү роль ойнойт.
Иш-чарага ӨКМдин өкүлдөрү, жергиликтүү бийлик, ЮНЕСКОнун өкүлдөрү жана тургундар катышты. Курулуш ийгиликтүү аяктап, дамба жергиликтүү бийликке пайдаланууга өткөрүлүп берилди.
Белгилей кетсек, GLOFCA долбоору ЮНЕСКОнун Алматыдагы регионалдык кеңсеси тарабынан Казакстан, Кыргызстан, Тажикстан жана Өзбекстан менен биргеликте ишке ашырылып, Адаптациялык фонд тарабынан каржыланууда.
