ЖК комитети "Баатыр энелердин" балдарына жеңилдик берүү долбоорун жактырды
13-апрелде Жогорку Кеңештин тиешелүү комитетинин жыйынында "Баатыр эне" ордени менен сыйланган энелердин балдарына мамлекеттик билим берүүдө жеңилдиктерди берүү тууралуу токтом долбоору каралып, жактырылды. Бул тууралуу ЖКнын Басма сөз кызматынан билдиришти.
Долбоордун демилгечилеринин бири, депутат Медер Чотонов билдиргендей, документтин максаты энелердин өзгөчө эмгегин таануу, социалдык адилеттүүлүктү камсыз кылуу жана билим алууга тең мүмкүнчүлүк түзүү болуп саналат. Мындан тышкары, демилге жаштардын билим деңгээлин жогорулатууга, үй-бүлө институтун чыңдоого жана демографиялык өсүшкө өбөлгө түзүүгө багытталган.
Талкуу учурунда депутаттар жеңилдиктерди берүү механизмдерине байланыштуу бир катар маселелерди көтөрүштү. Атап айтканда, депутат Токтобүбү Ашымбаева жогорку окуу жайларында буга чейин каралган 10 миң гранттык орундан тышкары кошумча 500 гранттык орун бөлүү тартибин кароо сунушун берди.
Ошондой эле жыйында "Баатыр эне" ордени менен сыйланган энелерге социалдык кепилдиктерди күчөтүү маселеси да айтылды.
Жыйынтыгында аталган токтом долбоору комитет тарабынан колдоого алынды.
