Олимпиаданын жеңүүчүлөрүнө төрт жылдык сый акы төлөө каралууда
Кыргызстанда олимпиадалык спортчуларга төрт жыл бою сый акы төлөө пландалууда. Бул тууралуу Жогорку Кеңештин жыйынында Дене тарбия жана спорт боюнча мамлекеттик агенттиктин директору Урмат Асанбаев билдирди.
Анын айтымына караганда, учурда олимпиадачыларга стипендияны төрт жылдык олимпиадалык циклдин ичинде төлөп туруу үчүн тиешелүү жобого өзгөртүүлөр даярдалууда.
Мисал катары ал Жоламан Шаршенбеков бир жыл гана стипендия алган жагдайды келтирди. Ошол эле учурда спортчу активдүү спорттук ишмердүүлүгүн улантууга тийиш. Эгер олимпиада чемпиону машыгууну жана мелдештерге катышууну токтотсо, анда ага олимпиада чемпиондору жана байге ээлери үчүн каралган өмүр бою төлөнүүчү стипендия гана берилет.
Урмат Асанбаев төрт жылдык стипендия төлөө мөөнөтүн мыйзамдык жактан бекемдей турган өзгөртүүлөр даярдалып жатканын кошумчалады.
