Сумсарсай дарыясына суу сактагыч куруу боюнча коомдук талкуу өттү
Чаткал районундагы Сумсарсай дарыясына суу сактагыч куруу боюнча коомдук талкуу өттү. Бул тууралуу Айыл чарба министрлигинен билдиришти.
Маалыматка ылайык, иш-чарага Суу ресурстары кызматынын жетекчилиги, Ала-Бука жана Чаткал райондорунун акимдери, ошондой эле жергиликтүү тургундар катышты.
Жолугушуунун жүрүшүндө катышуучуларга долбоор тууралуу маалымат берилип, анын калкты жана айыл чарбасын сугат суу менен камсыз кылуудагы мааниси, ошондой эле Айратам өрөөнүндөгү сугат жерлерин өнүктүрүү мүмкүнчүлүктөрү тааныштырылды.
Белгиленгендей, долбоор ишке ашырылса, сугат жерлеринин аянты болжол менен 1500 гектарга көбөйүп, айыл чарбасын өнүктүрүүгө жана түшүмдүүлүктү жогорулатууга шарт түзүлөт.
Учурда долбоордун техникалык варианттары жана экологиялык аспектилери боюнча иштер улантылууда.
Жолугушуунун жыйынтыгында протокол кабыл алынып, анда суу сактагычты куруунун зарылдыгы белгиленип, долбоорлоо иштерин улантуу жана кийинки этапта суу сактагычтын курулушун баштоо каралды.
