Бишкектеги сейил бактардын абалы текшерилди
Бишкек шаарынын мэри Айбек Жунушалиев көчмө жыйын өткөрүп, анын жүрүшүндө коомдук жайларды көрктөндүрүү, сейил бактардын абалы жана социалдык объекттердин курулушунун жүрүшү менен таанышты. Бул тууралуу Бишкек шаардык мэриясынан билдиришти.
Маалыматка ылайык, көчмө жыйындын алгачкы объектиси болуп Ала-Арча дарыясынын боюндагы Малдыбаев көчөсүнөн Түштүк Чоң Чүй каналына чейин жана Жибек Жолу проспектине чейинки аймак болду. Бул жерде борбор калаанын башчысы дарыянын жээгинде жайгашкан курулуш компаниялардын өкүлдөрү менен жолугушту.
Айбек Жунушалиев сейилдөө аймагын көрктөндүрүү иштерин ага чектеш аймактарды да камтыган комплекстүү негизде жүргүзүү зарылдыгын белгиледи. Буга байланыштуу курулуш компанияларына тиешелүү иштерди кечиктирбестен баштоо тапшырмасы берилди.
Андан соң мэр жакынкы күндөрү оңдоо иштери баштала турган Дайыр Асанов атындагы сейил бакка барды. Көчмө жыйындын жүрүшүндө сейил бактын инфраструктурасын жаңылоо боюнча алдыдагы иштер талкууланып, тиешелүү тапшырмалар берилди.
Кийинки объекттер Кыргызстан менен Азербайжандын Достук сейил багы жана "Байтик" паркы болду. Текшерүү учурунда борбор калаанын башчысы ижарачылардын колдонуусунда болгон сейил бактардын абалын сынга алды. Айбек Жунушалиев жооптуу кызматтарга аныкталган бардык мыйзам бузууларды четтетүү жана аймактарды тиешелүү абалына келтирүү үчүн ижарачыларга бир жумалык мөөнөт берүүнү тапшырды. Талаптар аткарылбаган учурда белгиленген тартипте ижара келишимдерин ырастоо маселесин кароо тапшырылды.
