Көрктөндүрүү талаптарын аткарбаган объекттилердин иштери токтотулду
Курулуш, архитектура жана турак жай-коммуналдык чарба министрлигинин “Курулуш объекттерин ишке ашырууда аймактарды көрктөндүрүүнү камсыз кылуу жөнүндө” буйругунун аткарылышы боюнча Баткен облусундагы курулуш объекттерине рейд жүргүзүлүүдө.
Курулуш, архитектура жана турак жай-коммуналдык чарба министрлигинин маалыматына ылайык, текшерүү иштеринин жүрүшүндө бир катар объекттердин айланасындагы көрктөндүрүү иштерин уюштуруу талаптарынын сакталбаганы аныкталды. Тактап айтканда, курулуш аянтчалары тиешелүү деңгээлде тосулбаган, жөө жүргүнчүлөрдүн коопсуздугу үчүн калкалоочу тосмолор жана чатырчалар орнотулган эмес, сырткы жарыктандыруу, кирүүчү жолдор жана автотранспорт каражаттарынын дөңгөлөктөрүн жуучу жайлары уюштурулган эмес.
Алар:
Кызыл-Кыя шаары, Ленин көчөсү 3б - 3-7 кабаттуу турак жай комплекси;
Кызыл-Кыя шаары, Кулатов көчөсү -7,8 кабатууу 2 блоктон турган турак жай комплекси;
Кызыл-Кыя шаары, Кулатов 132а -7-кабаттуу турак жай комплекси.
Жыйынтыгында курулуш иштерин жүргүзүп жаткан “Золотой Квадрат” , “Элит Гранд”, “Асыл Холдинг” ЖЧКларына карата акт түзүлүп, аныкталган мыйзам бузуулар жоюлганга чейин курулуш иштери убактылуу токтотулду.
Мамлекеттик архитектура-курулуш контролдоо департаменти “Курулуш өндүрүшүн уюштуруу” талаптарын так сактоо зарылдыгын эскертет. Белгиленген талаптар аткарылбаган учурда курулуш-монтаждоо иштерин жүргүзүүгө жол берилбейт.
